بشار الكيماوي.. شو ناوي؟
بقلم جحا الدمشقي

كلما عم افتح على قناة أو إذاعة او صحيفة ما عم لاقي إلهم سيرة غير قصة الكيماوي..

بصراحة الفار لعب بعبي!!

أنا حاسس أنه ما صدقوا لاقوا لهم سيرة يلهوا فيها العالم عن القتل والتدمير والقصف بالطيران على المدن والمناطق السكنية... وكأنه كل هدا صار مقبول مقابل المتوقع من الخساير إذا استخدموا الكيماوي.. متل ما صار -من قبل- موضوع المعتقلين مهمش قدام مناظر القتل اليومي بالعشرات والمئات.. غير المصابين والمهجرين..

وكأنه ضمير "آبلة حكمت" الدولي بده كل شوية جرعة مخدر أقوى من اللي قبلها ليقدر يهضم أنه شاف وسمع وقرأ عن كل هالجرائم والمجازر وما تحركت له شعرة لسى إلا شعرات لسانه "ونحن طلع على لساننا شعر كمان"

وإذا بشار استخدم الكيماوي؟! ويمكن هدا مو بعيد عليه!! ..شو ببالكم رح يساووا.. أكتر من الحكي!! ورح يقولوا يا ويله بس إذا استخدم الجرثومي.. ولو استخدم البيولوجي رح يقولوا يا ويله لو كان عنده نووي.. يعني اطمنوا ضمير العالم في سبات عميق وجرعات المخدر المناسب متوفرة "أكتر من الهم على قلوب السوريين"

يعني كتير في فرق بين خمس وعشرين ألف شهيد بخمسة عشر شهر، وخمسة وعشرين الف شهيد بخمس دقايق؟!

وإلا في حدى عاقل مفكر انه هدا شي كتير مؤثر على السياسة الدولية من الطرفين اللي كل واحد أخ.. من التاني

اللي عم ينحكى عن السلاح الكيماوي أبدا مو مقصود فيه أنه ما يستخدم ضد الشعب السوري لأنه هدا آخر همهم.. والمهم عندهم أنه هالسلاح أو جزء منه ما يوقع بإيدين مو مأمونة بالنسبة إلهم ويستخدم –عاجلا أم آجلا- ضدهم أو ضد مصالحهم بالمنطقة.. هدا جل الموضوع والباقي من نافلة القول

ومن هالزاوية بس خوفهم أنه اثناء تحريك هي الترسانة أو استخدامها أنه يتم الاستيلاء عليها او على جزء منها.. لك حتى عم يتحسبوا انه ممكن بعض ضباط بشار يبيعوها بالسوق السودا إذا انفلتت الامور.. أما الشعب السوري وضحايا الشعب السوري.. فيا الله ما إلنا غيرك يا الله

وبصراحة حاسس أنه مهم نطلع القذافي من قبره شوية ليقول للمجتمع الدولي كلمته المشهورة.. وياخد بشار الكيماوي بإيده ويرجع

الكيماوي كذبه كذبها الإسرائيليين والأمريكان ويريدون ترويجها

في لايوجد لاكيماوي ولا بطيخ يعني فكركم لو في كيماوي في سورية

كانت إسرائيل تركته لهلئ وطيرانها يوميا رايح جاي على سورية حتى القصر

الرئاسي في سورية مابيناموا إلا على أصوات الطائرات الحربية الإسرائيلية

كل مافي الأمر ياأخوان إن اولاد الكلب الإسرائيليين والأمريكان يريدون تطبيق السيناريو

العراقي في سورية حيث أنه في حالة سقوط نظام الأسد الحليف وتسلمت السلطة قوى معادية

لإسرائيل يتم ضربها في حجة الكيماوي هاه ياحبيبنا ناوي تفهم الطبخة ولا ماناوي؟

لا اظن انها كذبه
بدليل ما قاله الطبيب عبد الحميد زكريا ان هناك مخزنان للاسلحة الكيميائية احدها في حمص و الاخر في عدرا على ما اظن


انسان عذب و قتل و حرق و نحر غير مستبعد انه يستخدم الكيماوي

اخشى من ان يقبل الاسد التنازل بشرط بقى بعض رموزه وذلك اثناء علمه بحتمية السقوط